- உட்லண்ட்ஸ் -

சென்னை 13-வது சர்வதேச பட விழாவில் வியாழன் அன்று உட்லண்ட்ஸ் திரையரங்கில் திரையிடப்படும் படங்களில் அறிமுகக் குறிப்புகள் இவை

காலை 11.30 மணி

THE FENCER / MIEKKAILIJA | DIR.:KLAUS HÄRÖ | FINLAND|2015|94’

சோவியத் போருக்குப் பிறகு நடக்கும் கதை. ரகசிய போலீஸ் பணியிலிருந்து தப்பித்து வரும் இளம் நெல்சிஸ் தனது சொந்த ஊருக்கு திரும்புகிறான். அங்கே இருக்கும் பள்ளியில் உடற்பயிற்சி ஆசிரியராக சேரும் அவன், பள்ளிச் சிறுவர்களின் நலனுக்காக கத்திச் சண்டை க்ளப் ஒன்றை தொடங்குகிறான். ஆனால் அதற்கு பள்ளியின் தலைமை ஆசிரியர் மறுக்கிறார். உள்ளூர் மக்களின் ஆதரவு அதிகமாக இருப்பதால் அந்த க்ளப் தொடங்கப்படுகிறது. இதனால் வஞ்சம் வளர்க்கும் அந்த தலைமை ஆசிரியர் நெல்சிஸின் கடந்த கால ரகசியங்களை வெளியிட முயற்சிக்கிறார். சோவியத் போருக்குப் பிறகான மக்களின் மனநிலை, பயங்களை இந்தப் படம் பேசுகிறது.

மதியம் 2.00 மணி

THE PARADISE SUITE | DIR.:JOOST VAN GINKEL | BULGARIA |2015|122’

அழகான இளம் பெண் ஜென்யா. தன் சொந்த ஊரான பல்கேரியாவிலிருந்து ஆம்ஸ்டெர்டாமுக்கு மேற்கொள்ளும் பயணம், அவள் கொண்டுள்ள எதிர்பார்ப்புகளை பொய்யாக்குகிறது. ஆப்பிரிக்காவைச் சேர்ந்த தேவதைப் போன்றவள் யாயா. சிறை வைக்கப்படும் அவள் தனது சுதந்திரத்துக்காக போராடுகிறாள்.

செர்பியாவின் போர் குற்றவாளியான இவிங்கா, ஒரு சண்டையில் தனது நம்பிக்கையை தவிர அனைத்தையும் இழக்கிறான். அப்போதுதான் ஒரு குழந்தைக்கு தந்தையாகியிருக்கும் அவன், குற்றங்கள் தண்டிக்கப்படாமல் போவதில்லை என்பதை வலியுடன் உணர்கிறான்.

தி பாரடைஸ் ஸ்வீட் 6 மனிதர்களின் வாழ்க்கையை பற்றிய கதை. அனைவரும் ஒருவரை ஒருவர் சந்திக்கின்றனர், ஒரே ஒரு பார்வையினால் ஒருவர் மற்றவரது வாழ்க்கையை பாதிக்கின்றனர்.

மாலை 4.30 மணி

ENCLAVE | DIR.: GORAN RADOVANOVIC | SERBIA|2015|92’

ஒரு கிறித்தவ சிறுவன் தனது இறந்த தாத்தாவுக்காக ஒரு சரியான இறுதிச்சடங்கை நடத்தவேண்டும் என தீர்மானிக்கிறான். எதிரிகளின் எல்லைகளைக் கடந்து செல்கிறான். ஆழமாக பிளவுபட்டிருக்கும் முஸ்லிம் சமுதாயத்தினர் அதிகம் உள்ள பகுதி அது. யுத்தத்தால் சீரழிந்த அந்த கொசோவா பகுதிகளில் சென்று அவர்கள் மத்தியில் நண்பர்களை உருவாக்கிக் கொள்கிறான்.

மாலை 7.00 மணி

AFERIM / AFERIM | DIR.:RADU JUDE ROMANIA | BULGARIA | CZECH REPUBLIC | FRANCE: |2015|108’

கிழக்கு ஐரோப்பா, 1835 ரோமானியாவின் வாலாச்சாப் பகுதி. அதன் மத்திய தரிசு நிலப் பகுதியில் குதிரைகளில் சவாரி செய்தபடி இருவர் வருகிறார்கள். அவர்கள் போலீஸ்கார கோஸ்டான்டினும் அவரது மகனும்தான். இருவரும் ஒரு ஜிப்ஸி அடிமையைத் தேடி வருகிறார்கள். காடு மலையெல்லாம் தேடி அலைகிறார்கள். தனது பிரபுவிடமிருந்து தப்பித்து ஓடிவந்த அந்த ஜிப்ஸியை ஒருவழியாகக் கண்டுபிடித்து அழைத்துச் செல்கிறார்கள்.

அதேநேரம் சூழ்நிலைக்கு தகுந்த மாதிரி கோஸ்டான்டின் சொல்லும் கருத்துக்கள் அனைத்தும் மகனுக்கு சிரிப்பை வரவழைக்கின்றன. அதில் நீதியும் இருக்கும், அதேநேரம் யாரையும் நோகடிக்காதது என்பதோடு உலகைப் பற்றிய ஒரு தெளிவான பார்வை கிடைக்கிறது.

துருக்கியர், ரஷ்யர்கள், கிறித்தவர்கள் மற்றும் யூதர்கள், ரோமானியர்கள் மற்றும் ஹங்கேரியர்கள் என வெவ்வேறு தேசிய இன மக்களையும் வித்தியாசமான நம்பிக்கைகள் கொண்டவர்களையும் அவர்கள் எதிர்கொள்கிறார்கள்.



- உட்லண்ஸ் சிம்பொனி -

சென்னை 13-வது சர்வதேச பட விழாவில் வியாழக்கிழமை உட்லண்ஸ் சிம்பொனி திரையரங்கில் திரையிடப்படும் படங்களில் அறிமுகக் குறிப்புகள் இவை

காலை 11 மணி

PRIYAMANASAM | DIR.:VINOD MANKARA | SANSKRIT|2015|110’

17-ம் நூற்றாண்டில் வாழ்ந்த திருவிதாங்கூர் மன்னரின் அரண்மனையைப் பற்றிய கதக்களி நாடகம் நளசரிதம் ஆட்டக்கதை. இதை எழுதிய உன்னாயி வாரியரின் வாழ்க்கையைச் சொல்கிறது ப்ரியமானசம் திரைப்படம். பழைய திருவிதாங்கூரின் மேன்மையைச் சொல்லி, அதனைச் சுற்றி வரும் ப்ரியமானசம், கோவில் பணியாளராக வேலை பார்த்த கவிஞரின் கதையைப் பேசுகிறது. கோவிலின் படங்களையும், பழங்கால மத நம்பிக்கைகளையும் அழகாகக் காட்சிப் படுத்தியிருக்கும் காதல் கதையே ப்ரியமானசம்.

மதியம் 2.30 மணி

I DON’T JUST WANT YOU TO LOVE ME | ICH WILL NICHT NUR, DASS IHR MICH LIEBT | DIR.: HANS GÜNTHER PFLAUM | GERMANY|1992|103’

ரெய்னர் வெர்னர் ஃபாஸ்பிண்டர் என்கிற ஜெர்மானிய திரைப்பட இயக்குநரின் வாழ்க்கையைப் பற்றியும் படைப்புகளைப் பற்றியும் சொல்லும் ஆவணப் படம். அவரது திரைப்படங்களிலிருந்து சிறந்த காட்சித் தொகுப்புகளையும், அவருடன் பணியாற்றியவர்களது பேட்டியும் நிறைந்துள்ள இந்தப் படம், அவரது வாழ்க்கை, சினிமா, சிந்தனை, படைப்பாற்றல் திறன் என வெவ்வேறு பகுதிகளாக பிரிக்கப்பட்டுள்ளது.ஃபாஸ்பைண்டர் குறித்து ஆர்வமுள்ள எவரும், ஐரோப்பிய சினிமாவை விரும்பும் எவரும், இந்த ஆவணப் படத்தால் ஈர்க்கப்படுவார்கள்.

மாலை 5.00 மணி

COURT | DIR.:CHAITANYA TAMHANE | MARATHI|2014|116′

சாக்கடையை சுத்தம் செய்யும் தொழிலாளியைத் தற்கொலைக்குத் தூண்டியதாக குற்றஞ்சாட்டப்பட்டு நாராயணன் காம்ளே என்ற மராத்திய கவிஞர் சிறையில் அடைக்கப்படுகிறார். அவருக்கு வருமானம் குழந்தைகளுக்கு டியூசன் சொல்லிக் கொடுத்து அதில் கிடைக்கும் சொற்ப வருமானம்தான். உண்மையில் கவிஞர் மேடையில் பாடல்கள் பாடியதைக் கேட்டு அந்த தொழிலாளி தற்கொலை செய்துகொண்டார். நீதிமன்றத்தில் அவருக்காக வாதாடி அவரை வெளியேக் கொண்டுவர போராடுகிறார் ஒரு வழக்கறிஞர்.

வெனிஸ் திரைப்பட விழாவில் பரிசு பெற்றுள்ள இந்தப் படம் மும்பை திரைப்பட விழாவிலும் மூன்று பரிசுகள் வென்றுள்ளது. இதன் இயக்குநர் சைதன்ய தம்ஹனா 27 வயது இளைஞர். இதில் நடித்த துப்புரவு தொழிலாளியின் மனைவி அசலானவர்.உண்மையில் சாக்கடை குழியில் இறந்த போன தொழிலாளி ஒருவரின் மனைவி! மற்ற நடிகர்களும் தொழில் முறை நடிகர்கள் அல்ல, இதற்கென்றே பயிற்சி தரப்பட்டு நடித்தவர்கள். சாதி, அரசியல் அதிகாரம் பற்றிய பல விவாதங்களைக் கொண்டிருக்கும், தூங்கும் யாரையும் தட்டி எழுப்பும் மராத்தி படம்தான் இந்த – ‘கோர்ட்’

மாலை 7.30 மணி

TREE OF KNOWLEDGE|KUNDSKABENS TRQ | DIR.: NILS MALMOROS DENMARK|1981|110’

மிக முக்கிய டீனேஜ் படங்களில் ஒன்று. டேனிஷ் இயக்குநரான நில்ஸ் மேல்மோரோஸ் வளரிளம் குழந்தைகளின் இயல்பை அழகாய்ப் படம் பிடித்திருக்கிறார். 13 முதல் 16 வயது வரையான சிறுவர்களின் வகுப்பறையில், படம் தொடங்குகிறது. எலின் என்னும் சிறுமி, ஹெல்ஜை டேட்டிங் செய்யவில்லை என்பதால், அந்தக் குழுவில் இருந்து வெளியேற்றப்படுகிறாள். இன்னொரு சிறுமியான மோனா, எலினின் இடத்தைப் பிடிக்க முயற்சிக்கிறாள். அவர்களோடு, வேடிக்கையான சிறுவன் வில்லி பாண்டே, நியல்ஸ் ஒலே உள்ளிட்டவர்களும் இப்படத்தில் முக்கிய கதாபாத்திரங்களாக இடம்பெற்றுள்ளார்கள்.

 

Comments

comments